കേരളം പുതിയ മുഖ്യമന്ത്രിയെ കാത്തിരുന്ന ദിവസങ്ങൾ വെറും രാഷ്ട്രീയ ചർച്ചകളുടെ ദിവസങ്ങളായിരുന്നില്ല. അത് ഭരണപരമായ അനിശ്ചിതത്വത്തിന്റെ ദിവസങ്ങളായിരുന്നു. ഒടുവിൽ വി.ഡി. സതീശൻ മുഖ്യമന്ത്രിയായി പ്രഖ്യാപിക്കപ്പെട്ടെങ്കിലും, ജനങ്ങളുടെ മനസ്സിൽ ഉയരുന്ന പ്രധാന ചോദ്യം ഇപ്പോഴും അതേയാണ് ,"കോൺഗ്രസ് ഹൈക്കമാൻഡിന്റെ രാഷ്ട്രീയ കളിയിൽ കേരളം ബലിയാടായോ?
2026ലെ നിയമസഭാ തിരഞ്ഞെടുപ്പിൽ യു.ഡി.എഫ് വ്യക്തമായ ഭൂരിപക്ഷം നേടി അധികാരത്തിലെത്തിയ നിമിഷം മുതൽ മുഖ്യമന്ത്രി ആരാകും എന്ന കാര്യത്തിൽ വലിയ ആശയക്കുഴപ്പമാണ് കോൺഗ്രസ് നേതൃത്വം സൃഷ്ടിച്ചത്. ജനങ്ങൾ ഭൂരിപക്ഷം നൽകിയതും ഭരണത്തിനായാണ്, അധികാരക്കസേരയെ ചുറ്റിപ്പറ്റിയ ഗ്രൂപ്പ് രാഷ്ട്രീയത്തിനല്ല. എന്നാൽ ദിവസങ്ങളോളം നീണ്ട ചർച്ചകളും ഡൽഹി കേന്ദ്രീകൃത നീക്കങ്ങളും കേരള ജനതയെ നിരാശരാക്കി.
വി.ഡി. സതീശൻ തന്നെ മുഖ്യമന്ത്രിയാകുമെന്ന് രാഷ്ട്രീയ നിരീക്ഷകർ തുടക്കത്തിൽ തന്നെ വിലയിരുത്തിയിരുന്നു. യു.ഡി.എഫിനെ വിജയത്തിലേക്ക് നയിച്ചതും, കഴിഞ്ഞ അഞ്ച് വർഷമായി പ്രതിപക്ഷ നേതാവെന്ന നിലയിൽ ശക്തമായ രാഷ്ട്രീയ പോരാട്ടം നടത്തിയതും അദ്ദേഹമായിരുന്നു. അങ്ങനെ ആയിരിക്കെ, അദ്ദേഹത്തിന്റെ പേരിൽ അന്തിമ തീരുമാനം എടുക്കാൻ ഇത്രയും കാലതാമസം എന്തിനായിരുന്നു?
ഇവിടെയാണ് കോൺഗ്രസ് ഹൈക്കമാൻഡിന്റെ രാഷ്ട്രീയം വീണ്ടും ചർച്ചയാകുന്നത്. കേരളത്തിലെ യാഥാർത്ഥ്യങ്ങളെക്കാൾ ഡൽഹിയിലെ ഗ്രൂപ്പ് സമവാക്യങ്ങൾക്കാണ് മുൻഗണന നൽകിയതെന്ന വിമർശനം ശക്തമാണ്. രമേശ് ചെന്നിത്തല, കെ.സി. വേണുഗോപാൽ എന്നീ നേതാക്കളുടെ പേരുകൾ ഉയർത്തിക്കാട്ടി അനാവശ്യമായ അനിശ്ചിതത്വം സൃഷ്ടിച്ചതും പാർട്ടിക്കുള്ളിലെ അധികാരപ്പോരിന്റെ ഭാഗമായാണ് രാഷ്ട്രീയ കേന്ദ്രങ്ങൾ വിലയിരുത്തുന്നത്.
അതിലുപരി, മുസ്ലിം ലീഗ്, ജമാഅത്തെ ഇസ്ലാമി പോലുള്ള വർഗ്ഗീയ ശക്തികളുടെ സമ്മർദങ്ങൾ കോൺഗ്രസ് നേതൃത്വത്തെ ബാധിച്ചോയെന്ന ചോദ്യവും ഉയരുന്നുണ്ട്. കേരളത്തിലെ ഭൂരിപക്ഷ ജനതയുടെ രാഷ്ട്രീയ മനോഭാവത്തേക്കാൾ മുന്നണി ഘടകങ്ങളുടെ താൽപര്യങ്ങൾ സംരക്ഷിക്കാനാണ് കോൺഗ്രസ് ശ്രമിച്ചതെന്ന ആരോപണവും സമൂഹമാധ്യമങ്ങളിൽ ശക്തമാണ്.
മുഖ്യമന്ത്രി ആരെന്ന കാര്യം തീർപ്പാക്കാൻ ദിവസങ്ങളോളം നീണ്ട ചർച്ചകൾ നടന്നപ്പോൾ, കേരളം ഭരണപരമായി അനിശ്ചിതത്വത്തിലായിരുന്നു. പുതിയ മന്ത്രിസഭയുടെ രൂപീകരണം വൈകി. വിവിധ വകുപ്പുകളിലെ അടിയന്തര തീരുമാനങ്ങൾ മുടങ്ങി. സാമ്പത്തിക പ്രതിസന്ധി നേരിടുന്ന സംസ്ഥാനത്തിന് വേഗത്തിലുള്ള ഭരണനടപടികൾ ആവശ്യമായ സമയത്താണ് രാഷ്ട്രീയ നീക്കങ്ങൾ മുൻപന്തിയിലായത്.
ജനങ്ങൾ ഒരു സർക്കാരിനാണ് വോട്ട് ചെയ്തത്, അധികാരവിനിമയ ചർച്ചകൾക്കല്ല. എന്നാൽ കോൺഗ്രസ് നേതൃത്വം വീണ്ടും ഒരിക്കൽ കൂടി തെളിയിച്ചത്, കേരളത്തിലെ രാഷ്ട്രീയ തീരുമാനങ്ങളുടെ അവസാന വാക്ക് ഇപ്പോഴും ഡൽഹിയിലാണെന്ന സത്യമാണ്. സംസ്ഥാനത്തെ ജനവിധിയേക്കാൾ ഗ്രൂപ്പ് താൽപര്യങ്ങൾക്കും സമവാക്യങ്ങൾക്കും മുൻഗണന നൽകുന്ന സംസ്കാരം കോൺഗ്രസിനെ തുടർച്ചയായി പ്രതിസന്ധിയിലാക്കുന്നുവെന്ന വിമർശനം ഇപ്പോൾ കൂടുതൽ ശക്തമാകുകയാണ്.
വി.ഡി. സതീശനെ മുഖ്യമന്ത്രിയാക്കേണ്ട തീരുമാനം ഒടുവിൽ എടുത്തെങ്കിലും, അതിലേക്കുള്ള യാത്രയിൽ കോൺഗ്രസ് പാർട്ടി ജനങ്ങളിൽ സൃഷ്ടിച്ച ആശയക്കുഴപ്പവും ഭരണത്തിലെ സ്തംഭനവും ചെറിയ കാര്യമല്ല. അധികാരത്തിലെത്തിയ ആദ്യ ദിവസങ്ങളിൽ തന്നെ ജനവിശ്വാസത്തെ ചോദ്യം ചെയ്യുന്ന സാഹചര്യമാണ് പാർട്ടി സ്വന്തം കൈകൊണ്ട് ഉണ്ടാക്കിയിരിക്കുന്നത്.
കേരളം ഇനി കാത്തിരിക്കുന്നത് രാഷ്ട്രീയ ഗ്രൂപ്പ് പോരുകൾ അവസാനിപ്പിച്ച് ജനങ്ങളുടെ പ്രശ്നങ്ങളിൽ കേന്ദ്രീകരിക്കുന്ന ഒരു ഭരണമാണ്. അല്ലാത്തപക്ഷം, ഈ കാലതാമസവും അനിശ്ചിതത്വവും പുതിയ സർക്കാരിന്റെ വിശ്വാസ്യതയെ തുടക്കത്തിൽ തന്നെ ബാധിക്കുമെന്ന ആശങ്ക ശക്തമാണ്.
