നീറ്റ് പരീക്ഷ റദ്ദാക്കി; ചോദ്യച്ചോർച്ച വിവാദത്തിൽ സിബിഐ അന്വേഷണം പ്രഖ്യാപിച്ച് എൻടിഎ
സംഭവത്തിൽ സിബിഐ അന്വേഷണം പ്രഖ്യാപിച്ചതോടെ വിവാദം ദേശീയ തലത്തിൽ വലിയ ചർച്ചയായി മാറിയിരിക്കുകയാണ്. പരീക്ഷയ്ക്ക് മുമ്പ് പ്രചരിച്ച മാതൃകാ ചോദ്യക്കടലാസിലെ നിരവധി ചോദ്യങ്ങൾ യഥാർത്ഥ പരീക്ഷയിലും വന്നുവെന്ന ഗുരുതര ആരോപണമാണ് ഉയർന്നത്.
രാജസ്ഥാൻ സ്പെഷൽ ഓപ്പറേഷൻസ് ഗ്രൂപ്പ് (SOG) നടത്തിയ പ്രാഥമിക അന്വേഷണത്തിൽ, മാതൃകാ ചോദ്യക്കടലാസിലെ 410 ചോദ്യങ്ങളിൽ 135 എണ്ണം യഥാർത്ഥ പരീക്ഷയിൽ ഉൾപ്പെട്ടതായി കണ്ടെത്തിയതായി എഡിജിപി വിശാൽ ബൻസാൽ വ്യക്തമാക്കി. കെമിസ്ട്രി, ബയോളജി വിഭാഗങ്ങളിലായിരുന്നു കൂടുതൽ സാമ്യം കണ്ടെത്തിയത്.
ആകെ 180 ചോദ്യങ്ങളാണ് നീറ്റ് പരീക്ഷയിൽ ഉണ്ടായിരുന്നത്. ഫിസിക്സ്, കെമിസ്ട്രി, ബോട്ടണി, സുവോളജി വിഷയങ്ങളിൽ നിന്ന് 45 ചോദ്യങ്ങൾ വീതം ഉൾപ്പെടുത്തിയ നാല് സെറ്റ് ചോദ്യക്കടലാസുകളാണ് ഉപയോഗിച്ചിരുന്നത്.
വാട്സാപ്പ് ഉൾപ്പെടെയുള്ള സോഷ്യൽ മീഡിയ പ്ലാറ്റ്ഫോമുകളിലൂടെ ചോദ്യങ്ങൾ പ്രചരിച്ചുവെന്ന രഹസ്യവിവരത്തെ തുടർന്നാണ് രാജസ്ഥാൻ പോലീസ് എഫ്ഐആർ രജിസ്റ്റർ ചെയ്ത് അന്വേഷണം ആരംഭിച്ചത്. രാജസ്ഥാനിലെ സീക്കർ, ജയ്പുർ, കോട്ട എന്നിവിടങ്ങളിലും ഉത്തരാഖണ്ഡിലെ ഡെറാഡൂണിലും നിന്നായി 12 പേരെ ചോദ്യം ചെയ്തിട്ടുണ്ട്.
സീക്കറിലെ ഒരു എൻട്രൻസ് കോച്ചിങ് സെന്ററാണ് മാതൃകാ ചോദ്യക്കടലാസ് വിദ്യാർഥികൾക്ക് കൈമാറിയതെന്നും, കേരളം, മഹാരാഷ്ട്ര, ഗുജറാത്ത് സംസ്ഥാനങ്ങളിലെ വിദ്യാർഥികൾക്കും ഇത് ലഭിച്ചതായും അന്വേഷണസംഘം സംശയിക്കുന്നു.
സംഭവം പുറത്തുവന്നതോടെ വിദ്യാർഥികളും രക്ഷിതാക്കളും വലിയ ആശങ്കയിലാണ്. വർഷങ്ങളായി തയ്യാറെടുത്ത വിദ്യാർഥികളുടെ ഭാവി അനിശ്ചിതത്വത്തിലായെന്നാണ് വ്യാപക വിമർശനം.
രാജ്യത്തെ ഏറ്റവും പ്രധാനപ്പെട്ട പ്രവേശനപരീക്ഷകളിലൊന്നായ നീറ്റിന്റെ വിശ്വാസ്യത തന്നെ ചോദ്യം ചെയ്യപ്പെടുന്ന സാഹചര്യത്തിൽ, സിബിഐ അന്വേഷണം നിർണായകമാകുമെന്നാണ് വിലയിരുത്തൽ.
