പയ്യടിമീത്തലിൽ റോഡിലേക്ക് മരം കടപുഴകി വീണു; ടാക്സി വാഹനത്തിന് കേടുപാട്, വൈദ്യുതി വിതരണം തടസപ്പെട്ടു
കോഴിക്കോട്: ശക്തമായ കാറ്റിനെ തുടർന്ന് കോഴിക്കോട് പയ്യടിമീത്തൽ പ്രദേശത്ത് വലിയ മരം കടപുഴകി റോഡിലേക്ക് വീണ് ഗതാഗത തടസം സൃഷ്ടിച്ചു. സംഭവസമയത്ത് റോഡിലൂടെ സഞ്ചരിക്കുകയായിരുന്ന മഹീന്ദ്ര സുപ്രോ ടാക്സി വാഹനത്തിന്റെ മുകളിലേക്കാണ് മരം വീണത്.
പാലാഴി സ്വദേശിയുടെ ഉടമസ്ഥതയിലുള്ള വാഹനത്തിനാണ് അപകടത്തിൽ ചെറിയ കേടുപാടുകൾ സംഭവിച്ചത്. വാഹനത്തിലുണ്ടായിരുന്നവർ അത്ഭുതകരമായി രക്ഷപ്പെടുകയും ആർക്കും പരിക്കേൽക്കാതിരിക്കുകയും ചെയ്തു.
മരം വീഴുന്നതിനിടെ വൈദ്യുതി ലൈനുകൾ പൊട്ടി വീഴുകയും കെഎസ്ഇബിയുടെ വൈദ്യുതി പോസ്റ്റിനും കേടുപാടുകൾ സംഭവിക്കുകയും ചെയ്തു. ഇതോടെ പയ്യടിമീത്തൽ ഉൾപ്പെടെയുള്ള സമീപ പ്രദേശങ്ങളിൽ വൈദ്യുതി വിതരണം തടസപ്പെട്ടു.
സംഭവത്തെ തുടർന്ന് ഫയർഫോഴ്സ് യൂണിറ്റ്, കെഎസ്ഇബി ജീവനക്കാർ, നാട്ടുകാർ എന്നിവർ ചേർന്ന് മരം മുറിച്ചുമാറ്റുന്നതിനും തകർന്ന വൈദ്യുതി ലൈനുകൾ പുനഃസ്ഥാപിക്കുന്നതിനുമുള്ള പ്രവർത്തനങ്ങൾ ആരംഭിച്ചു. മരം റോഡിലേക്ക് വീണതിനെ തുടർന്ന് മണിക്കൂറുകളോളം ഗതാഗതം തടസപ്പെട്ടിരുന്നു.
വൈദ്യുതി ബന്ധം എത്രയും വേഗം പുനഃസ്ഥാപിക്കാനുള്ള ശ്രമങ്ങൾ പുരോഗമിക്കുകയാണെന്ന് അധികൃതർ അറിയിച്ചു.
Tags:
Keralam
