അങ്കമാലിയിൽ പൊതുശ്മശാനം നിർമ്മാണം വൈകുന്നു; പ്രതീകാത്മക സംസ്കാരചടങ്ങുമായി ബിജെപി പ്രതിഷേധം

അങ്കമാലിയിൽ പൊതുശ്മശാനം നിർമ്മാണം വൈകുന്നു; പ്രതീകാത്മക സംസ്കാരചടങ്ങുമായി ബിജെപി പ്രതിഷേധം

ബി ജെ പി അങ്കമാലി മുനിസിപ്പൽ കമ്മിറ്റിയുടെ നേതൃത്വത്തിൽ പൊതുശ്മശാനം നിർമ്മാണം വൈകുന്നതിൽ പ്രതിഷേധിച്ച് പ്രതീകാത്മക സംസ്കാരചടങ്ങ് നടത്തി. നഗരസഭ ബജറ്റിൽ എല്ലാ വർഷവും പൊതുശ്മശാനത്തിനായി ലക്ഷക്കണക്കിന് രൂപ വകയിരുത്തുന്നുണ്ടെങ്കിലും, ഈ തുക ശ്മശാന നിർമ്മാണത്തിനായി ചെലവഴിക്കാതെ മറ്റ് ആവശ്യങ്ങൾക്കായി മാറ്റിവെക്കുകയാണെന്ന് ബിജെപി നേതാക്കൾ ആരോപിച്ചു.

കഴിഞ്ഞ ഭരണസമിതിയുടെ അവസാനഘട്ടത്തിൽ മുനിസിപ്പൽ ബസ് സ്റ്റാൻഡ് പരിസരത്ത് പൊതുശ്മശാനത്തിനായി തറക്കല്ലിട്ടിരുന്നുവെങ്കിലും, തുടർന്ന് യാതൊരു നിർമാണ നടപടികളും നഗരസഭ കൈക്കൊണ്ടിട്ടില്ലെന്നും നേതാക്കൾ പറഞ്ഞു. അങ്കമാലി നഗരസഭ പരിധിയിലെ സാധാരണക്കാർ മരണാനന്തര സംസ്കാരചടങ്ങുകൾക്കായി ഇന്നും സമീപ പഞ്ചായത്തുകളെ ആശ്രയിക്കേണ്ട അവസ്ഥ തുടരുകയാണെന്നും അവർ ചൂണ്ടിക്കാട്ടി.

Kerala State Road Transport Corporation കെഎസ്ആർടിസി പരിസരത്ത് നിന്ന് പ്രതീകാത്മക ശവമഞ്ചം വഹിച്ച് നഗരസഭ ഓഫീസിലേക്കുള്ള പ്രതിഷേധ മാർച്ച് സംഘടിപ്പിച്ചു. ബിജെപി ജില്ലാ സെക്രട്ടറി എൻ. മനോജ് മാർച്ച് ഉദ്ഘാടനം ചെയ്തു.

മണ്ഡലം പ്രസിഡന്റ് രാഹുൽ പാറക്കടവ്, സംസ്ഥാന കൗൺസിൽ അംഗം സി. എം. ബിജു, ജനറൽ സെക്രട്ടറിമാരായ അഡ്വ. വി. എൻ. സുഭാഷ്, എ. വി. രഘു, മുനിസിപ്പൽ കൗൺസിലർമാരായ സുപ്രിയ കെ. എസ്, ഷീന മനോജ്, മണ്ഡലം വൈസ് പ്രസിഡന്റ് ലാലു പൈനാടത്ത്, സെക്രട്ടറിമാരായ വാസന്തി പ്രശാന്ത്, സാന്ദ്ര, അംബിക സുബ്രഹ്മണ്യൻ, അങ്കമാലി മുനിസിപ്പൽ പ്രസിഡന്റ് സന്ദീപ് ശങ്കർ, ഹിന്ദു ഐക്യവേദി ആലുവ താലൂക്ക് പ്രസിഡന്റ് ടി. കെ. കുട്ടപ്പൻ, മുരളി കറുകുറ്റി, കെ. അഭിലാഷ്, ജയൻ കറുകുറ്റി എന്നിവർ പ്രതിഷേധ പരിപാടിയിൽ പങ്കെടുത്തു.

പൊതുശ്മശാന നിർമ്മാണം അടിയന്തരമായി ആരംഭിക്കണമെന്നും അല്ലാത്തപക്ഷം സമരം ശക്തമാക്കുമെന്നും ബിജെപി നേതാക്കൾ മുന്നറിയിപ്പ് നൽകി.