കോഴിക്കോട്: ഫറോക്ക് സ്വദേശിയായ യുവാവിന് നിപ വൈറസ് ബാധ സ്ഥിരീകരിച്ചതിനെ തുടർന്ന് ആരോഗ്യവകുപ്പ് ജാഗ്രത ശക്തമാക്കി. രോഗബാധിതനുമായി സമ്പർക്കത്തിലായ 77 പേരെ തിരിച്ചറിഞ്ഞ് നിരീക്ഷണത്തിലാക്കിയതായി ആരോഗ്യവകുപ്പ് അറിയിച്ചു. വീട്ടുകാർ, അയൽവാസികൾ, സുഹൃത്തുക്കൾ, സഹപ്രവർത്തകർ, ആരോഗ്യപ്രവർത്തകർ എന്നിവരാണ് സമ്പർക്കപ്പട്ടികയിൽ ഉൾപ്പെട്ടിരിക്കുന്നത്.
സമ്പർക്കപ്പട്ടികയിലുള്ളവരിൽ 58 പേർ ആരോഗ്യപ്രവർത്തകരും 14 പേർ കുടുംബാംഗങ്ങളും അഞ്ചുപേർ സുഹൃത്തുക്കളും സഹപ്രവർത്തകരുമാണ്. നിലവിൽ ആർക്കും രോഗലക്ഷണങ്ങൾ റിപ്പോർട്ട് ചെയ്തിട്ടില്ല. രണ്ടുപേർ അതീവ അപകടസാധ്യതാ വിഭാഗത്തിലും 13 പേർ ഉയർന്ന അപകടസാധ്യതാ വിഭാഗത്തിലും 62 പേർ കുറഞ്ഞ അപകടസാധ്യതാ വിഭാഗത്തിലുമാണ് ഉൾപ്പെട്ടിരിക്കുന്നത്. ആദ്യ രണ്ട് വിഭാഗങ്ങളിലുള്ള എല്ലാവർക്കും ക്വാറന്റൈൻ നിർദേശം നൽകിയിട്ടുണ്ട്.
രോഗബാധിതന്റെ യാത്രാവിവരങ്ങളും സമ്പർക്കവിവരങ്ങളും ഉൾപ്പെടുത്തി ആരോഗ്യവകുപ്പ് റൂട്ട് മാപ്പ് തയ്യാറാക്കിയിട്ടുണ്ട്. നിലവിൽ യുവാവ് കോഴിക്കോട് മെഡിക്കൽ കോളേജിലെ തീവ്രപരിചരണ വിഭാഗത്തിൽ ചികിത്സയിലാണ്. കോഴിക്കോട് മെഡിക്കൽ കോളേജിലെ പരിശോധനയ്ക്ക് പിന്നാലെ പുണെ വൈറോളജി ഇൻസ്റ്റിറ്റ്യൂട്ടിലും നടത്തിയ പരിശോധനയിലാണ് നിപ വൈറസ് ബാധ സ്ഥിരീകരിച്ചത്.
രാമനാട്ടുകര മുൻസിപ്പാലിറ്റി ഓഫീസിൽ ചേർന്ന അവലോകന യോഗത്തിൽ സംസ്ഥാനതല നിർദേശങ്ങൾ അനുസരിച്ച് തുടർനടപടികൾ സ്വീകരിക്കാൻ തീരുമാനിച്ചു. സാഹചര്യം വിലയിരുത്തി ആവശ്യമെങ്കിൽ രോഗബാധിതന്റെ പ്രദേശം കണ്ടെയ്ൻമെന്റ് സോണായി പ്രഖ്യാപിക്കാനും സാധ്യതയുണ്ടെന്ന് അധികൃതർ അറിയിച്ചു.
ഇതിനിടെ രോഗപ്രതിരോധ പ്രവർത്തനങ്ങൾ ഫീൽഡ് തലത്തിൽ ശക്തമാക്കിയിട്ടുണ്ട്. റാപ്പിഡ് റെസ്പോൺസ് ടീം (ആർആർടി) യോഗങ്ങൾ ചേർന്ന് സ്ഥിതിഗതികൾ വിലയിരുത്തി. ആരോഗ്യപ്രവർത്തകർക്കായി പി.പി.ഇ കിറ്റുകൾ, മാസ്കുകൾ, ഗ്ലൗസുകൾ തുടങ്ങിയ സുരക്ഷാ ഉപകരണങ്ങൾ ലഭ്യമാക്കിയിട്ടുണ്ട്. മുൻകരുതൽ മരുന്നുകളുടെ ലഭ്യതയും ഉറപ്പുവരുത്തുന്ന നടപടികൾ പുരോഗമിക്കുകയാണ്.
ജനങ്ങളുടെ സംശയനിവാരണത്തിനായി ജില്ലാ മെഡിക്കൽ ഓഫീസിൽ പ്രത്യേക കൺട്രോൾ റൂമും ആരംഭിച്ചിട്ടുണ്ട്. ഹെൽപ്ലൈൻ നമ്പറുകൾ: 0495 2373901, 9072007767.
ഒരാഴ്ച മുമ്പ് കടുത്ത പനിയോടെയാണ് യുവാവ് ആശുപത്രിയിൽ പ്രവേശിപ്പിക്കപ്പെട്ടത്. തുടർന്ന് രോഗലക്ഷണങ്ങൾ ശക്തമാവുകയും ആരോഗ്യനില വഷളാവുകയും ചെയ്തതോടെയാണ് നിപ പരിശോധന നടത്തിയത്. രോഗിയെ പ്രവേശിപ്പിച്ചതിനെ തുടർന്ന് കോഴിക്കോട് മെഡിക്കൽ കോളേജിലെ ബന്ധപ്പെട്ട വാർഡുകളിലും പരിസര പ്രദേശങ്ങളിലും പ്രത്യേക നിയന്ത്രണങ്ങൾ ഏർപ്പെടുത്തിയിട്ടുണ്ട്.
വവ്വാലുകളിലും ചില മൃഗങ്ങളിലുമുള്ള വൈറസ് മനുഷ്യരിലേക്ക് പകരുന്നതിലൂടെ ഉണ്ടാകുന്ന ജന്തുജന്യ രോഗമാണ് നിപ. വൈറസ് ബാധിച്ച വവ്വാലുകളുടെ ഉമിനീർ, മൂത്രം എന്നിവ കലർന്ന ഭക്ഷണപദാർത്ഥങ്ങളിലൂടെയോ വവ്വാൽ കടിച്ച പഴങ്ങളിലൂടെയോ രോഗം പകരാം. പനി, തലവേദന, ശരീരവേദന, ഛർദ്ദി, ശ്വാസതടസം, ബോധക്ഷയം എന്നിവയാണ് പ്രധാന ലക്ഷണങ്ങൾ.
രോഗലക്ഷണങ്ങൾ പ്രകടമാകാൻ നാല് മുതൽ 14 ദിവസം വരെ സമയമെടുക്കാമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. രോഗബാധിതരുമായി സമ്പർക്കത്തിലായവർ കർശനമായ ജാഗ്രത പാലിക്കണമെന്നും ആരോഗ്യവകുപ്പിന്റെ നിർദേശങ്ങൾ കൃത്യമായി അനുസരിക്കണമെന്നും അധികൃതർ അഭ്യർത്ഥിച്ചു.
